Euskal Girotze Barnetegiak

2024-2025 DEIALDIA. ESKAERAK EGITEKO EPEA: 2024/03/04-2024/03/22

         Euskal Girotze Barnetegien helburu nagusiak dira ikasleen artean euskararen erabilera eta haren aldeko motibazioa indartzea, eta euskararekiko eta euskal kulturarekiko ezagutza eta atxikimendua hobetzea. Horretarako, euskaraz eta euskararen inguruan hitz egiteko guneak eta jarduerak eskaintzen zaizkie egonaldian zehar, baita, halaber, euskararekiko eta euskal kulturarekiko dituzten erreferentziak gehitu eta gaurkotzeko tresnak ere. Horrekin batera, hizkuntzen gaineko hausnarketa bideratzen da, zeinetan hizkuntza aniztasuna, gutxiagotutako hizkuntzak eta hizkuntza ekologia bezalako gaiak jorratzen diren. Hori guztia talde kohesioa eta norberekiko konfiantza emozioetatik eta jolasaren bidez landuz. Helburu horrekin, ikasturtean zehar 4 eguneko egonaldiak eskaintzen dira LMH3tik DBH2ra bitarteko ikasleentzako.

        Gainera, Hezkuntza Sailaren Laguntza Zerbitzua diren aldetik, euskararen aldeko jarrera eta motibazioa bultzatzeko landu eta probatu dituzten metodologia eta baliabideak eskaintzea eta gai horren inguruan laguntza eta aholkua ematea ere xede dute Euskal Girotze Barnetegiek. Alde horretatik, taldearekin batera bertaratzen diren irakasleentzat ere prestakuntza gune izan nahi dute.  Bide hori egiteko, 24 irakasleko talde egonkorra eskaintzen dute, lan horretan arituak eta adituak diren irakasleak.

       1985-86 ikasturtean burutu ziren lehenengo euskal girotze egonaldiak Eubako barnetegian. Geroztik, beste barnetegi batzuk sortu dira, eta gaur egun 6 Euskal Girotze Barnetegi ditu Hezkuntza Sailak: Barria, Elgoibar, Gorozika, Hondarribia, Lemoiz  eta Zerain.

 

 

Euskal Girotze Barnetegiak honako baldintza hauek betetzen dituzten ikasle-taldeentzat daude eraturik:

  • LMH 3tik DBH 2ra bitarteko ikasleentzako egonaldiak dira.
  • Ikasle-taldea ikastetxeko ikasgela naturala izango da.

Egonaldiak 4 egunekoak dira: astelehen goizean hasi eta ostegun arratsaldeko seietan bukatuko dira. Egonaldiaren egun kopurua eta iraupena ezingo dira ez laburtu ez luzatu. Ikasle-talde bakoitzak egonaldi bakarra egiteko aukera izango du.

Ikastetxeak egingo duen eskaera barnetegiren batean txanda eskuratzeko izango da, baina ez barnetegi jakin batean. Txanden banaketa egiteko eratuko den batzordeak egingo du sei barnetegietako egonaldi-txanden esleipena.

2024-2025 ikasturterako barnetegien araudia eta triptikoa

2024-2025ko deialdian izena emateko epea  martxoaren 4tik 22ra bitartean egongo da zabalik, bi egunak barne. Eskabideak egiteko:

Herri ikastetxeek:

https://educacion.hezkuntza.net/group/deialdiak/egb-2024

Itunpeko ikastetxeek:

 https://www.euskadi.eus/zerbitzuak/0036612